Լուրեր [196] |
Բնապահպանական [11] |
Խմբագրական [5] |
Քրեական [7] |
Առողջապահական [5] |
Սոցիալական [6] |
Գյուղատնտեսություն [5] |
Դատական [7] |
Կրթություն [7] |
Վիդեոսրահ [1] |
Մշակույթ [5] |
Մարզական [9] |
Համայնք [21] |
18:28 Հայաստանի բնության հատուկ պահպանվող տարածքները և ԲՀՀ-ի (WWF)-ի դերը նրանց զարգացման գործում. Սեմինար Դիլիջանի Օրհուս կենտրոնում | |
Հոկտեմբերի 9-ին Դիլիջանի Օրհուս կենտրոնում Բնության համաշխարհային հիմնադրամի (WWF) հայաստանյան մասնաճյուղի ներկայացուցիչներ Ա.Խոյեցյանը և Ս.Գալստյանը անցկացրեցին սեմինար ՙՀայաստանի բնության հատուկ պահպանվող տարածքները և ԲՀՀ-ի (WWF)-ի դերը նրանց զարգացման գործում՚ թեմայով: Մասնակցում էին հասարակական կազմակերպությունների, ՙԱրևորդի՚ և բնապահպանական, երիտասարդական ակումբների, Իջևանի Օրհուս կենտրոնի ներկայացուցիչներ, ուսումնական հաստատությունների ուսանողներ: Նպատակն էր ծանոթացնել ԲՀՀ-ի և նրա հայաստանյան մասնաճյուղի գործունեությանը, տեղեկացնել Հայաստանի և Կովկասի կենսաբազմազանության և սպառնացող վտանգների, ՀՀ-ի բնության հատուկ պահպանվող տարածքների (ԲՀՊՏ) ոլորտում պետության դերի, ռազմավարությունների, օրենսդրական և ինստիտուցիոնալ դաշտի, ինչպես նաև զարգացման հեռանկարների մասին:
Սեմինարի սկզբում հյուրերը ողջունեցին մասնակիցներին և շնորհակալություն հայտնեցին կենտրոնի համակարգողին միջոցառումը նախաձեռնելու առիթով: Սեմինարն անց էր կացվում համակարգչային շնորհանդեսի օգնությամբ: Ա. Խոյեցյանը ընդհանուր տեղեկատվություն հաղորդեց ԲՀՀ-ի ստեղծման պատմության և կազմակերպության առաքելության մասին: Կովկասում այն սկսել է գործել 1992 թ.-ին (քարտուղարությունը գտնվում է Շվեյցարիայի Գլան քաղաքում), իսկ ՀՀ-ում 2001-ից որպես ԲՀՀ-ի կովկասյան գրասենյակի հայաստանյան ներկայացուցչություն, իսկ 2006-ից` որպես ԲՀՀ-ի հայաստանյան մասնաճյուղ: ԲՀՀ-ի առաքելությունն է կասեցնել մոլորակի բնական միջավայրի դեգրադացիան ու կառուցել այնպիսի ապագա, որտեղ մարդիկ ներդաշնակ կապրեն բնության հետ: ԲՀՀ-ի հայաստանյան մասնաճյուղը աջակցում է ԲՀՊՏ-ների ու դրանց ցանցի ստեղծմանը, տրամադրում է խորհրդատվական և տեխնիկական օժանդակություն, բնական պաշարների կայուն օգտագործման աջակցություն, տարածում է տեղեկատվություն, խթանում տուրիզմի զարգացումը և այլն: Համագործակցում է բազմաթիվ տեղական ու միջազգային, պետական և ոչ պետական կառույցների հետ: ՀՀ-ի և Կովկասի կենսաբազմազանությունը և սպառնացող վտանգները ներկայացրեց Ս.Գալստյանը: Կովկասի էկոտարածաշրջանը կենսաբազմազանության առումով ամենահարուստ և միևնույն ժամանակ ամենավտանգված 34 ՙթեժ կետերի՚ շարքում է (Conservation International-ի կողմից կազմված ցուցակ) ինչպես նաև ԲՀՀ-ի 200 գլոբալ խոցելի տարածաշրջաններից է: Մշակվել է Կովկասի էկոտարածաշրջանի բնապահպանական պլան, որը ներառում է պահպանության մի շարք ոլորտներ: Այնուհետև անցկացվեց խմբային աշխատանք, որի նպատակն էր պարզել, թե մասնակիցները ինչպես են պատկերացնում կենսաբազմազանության նշանակությունը մարդու և բնության համար: Ս. Գալստյանը հավելեց, որ կենսաբազմազանության դերը մարդու գոյության համար նշանակալի է, սակայն մարդը որսագողությամբ, ձկնորսության մեծ ծավալներով, միջավայրի աղտոտմամբ, պաշարների անկայուն օգտագործմամբ հարված է հասցնում շրջակա կենսաբազմազանությանը: Ներկայացվեցին կենսաբազմազանության պահպանության ընդունված ձևերը: Քարտեզով ցույց տրվեցին ՀՀ-ի պահպանվող տարածքները` պետական արգելոցները, ազգային պարկերը, արգելավայրերը, բնության հուշարձանները, որոնց մակերեսը կազմում է 335.000 հա կամ ՀՀ-ի տարածքի 11 %-ը: Ներկայացվեց նաև ԲՀՊՏ-երի ուղղությամբ մշակված ռազմավարությունը և գործողությունների ազգային ծրագիրը (հաստատված է 2002 թ.-ին), կիրառվող ազգային և միջազգային օրենսդրությունը, առկա խնդիրները, ընթացիկ գործողությունները, արգելոցների կառավարման ծրագրերը, ֆինանսավորման աղբուրները և այլն: Այնուհետև Ա.Խոյեցյանը ներկայացրեց ԲՀՀ հայաստանյան գրասենյակի դերը և ծրագրերը ԲՀՊՏ-երի ցանցի զարգացման գործում: Մասնաճյուղի գործունեության առանցքում կարևորվում է նաև գործարար հատվածի հետ համագործակցությունը, և բացատրվեց թե ինչ մոդել է գործում այդ հատվածին ԲՀՀ-ի ծրագրերում ներգրավվելու և լրացուցիչ ֆինանսավորման հոսքեր հայթայթելու ուղղությամբ: Մասնակիցները դիտեցին ՙՈրսագողություն՚ տեսաֆիլմը: Բոլորին բաշխվեցին ուսուցողական նյութեր: Ընթացավ նաև քննարկում: Մասնակիցները կարևորեցին այս դասընթացի կազմակերպումը համայնքում, քանի որ առաջին անգամ էին մասնակցում և ավելին իմացան Հայաստանում այդ կազմակերպության գործունեության մասին: Նաև գիտակցեցին, որ հարկավոր է շրջակա միջավայրի և կենսաբազմազանության պահպանման ոլորտներում լիարժեքորեն համախմբել ուժերը ու մասնակցել նման իրազեկման նախաձեռնություններին` դրանցում ներգրավելով նաև որոշումներ կայացնողներին և հասարակության լայն շրջանակներին: ԲՀՀ հայաստանյան մասնաճյուղի գործունեությանը կարող եք ծանոթանալ www.panda.org/armenia վեբ.կայքում: Արարատ Ալիխանյան Դիլիջանի Օրհուս կենտրոնի համակարգող Վեբ.կայք. www.aarhus.am Էլ.փոստ. info_dilijan@aarhus.am հեռ.(+374268)2-31-38, բջջ.(+37491)727941 | |
|
Всего комментариев: 1 | ||
| ||