Հոկտեմբերի 5-ին Իջեւան քաղաքի ավագանու 7 անդամ գրավոր դիմել է քաղաքապետարանի քարտուղար Բորիս Թանանյանին` պահանջելով ավագանու արտահերթ նիստ հրավիրել` օրակարգում ունենալով քաղաքապետ Վարուժան Ներսիսյանի անվստահության հիմքերը: Սակայն նիստ չի հրավիրվել: Հաջորդ օրը ավագանու անդամները այցելելով քաղաքապետարան` այնտեղ չեն գտել ոչ քաղաքապետին, ոչ նրա տեղակալին, ոչ էլ քաղաքապետարանի քարտուղար Բ. Թանանյանին: Վարուժան Ներսիսյանի քարտուղարուհին ասել է, որ նրանք Երեւան են մեկնել: Նույն օրը ավագանին ինքն է նիստ գումարել եւ միաձայն` 8 կողմով (ավագանու 5 անդամ, այդ թվում` քաղաքապետի եղբայր, «Իջեւանի բժշկական կենտրոն» ՓԲԸ տնօրեն Հրաչ Ներսիսյանը բացակայել են) որոշել է , որ ներկայացված հիմքերը բավարար են քաղաքապետ Վարուժան Ներսիսյանի հրաժարականը պահանջելու համար: Այդ որոշումը նույն օրը ներկայացվել է Տավուշի մարզպետ Արմեն Ղուլարյանին: