Ի՞նչ է հարկավոր ոստիկանության եւ զանգվածային լրատվամիջոցների փոխհարաբերությունների բարելավման համար: Այս խնդիրն էր հուլիսի 25-ին քննարկվում Իջեւանի ՙԷլիտ՚ ռեստարանում կազմակերպված ՙկլոր սեղանի՚ ժամանակ, որը կազմակերպել էր ՙԻրավական հետազոտությունների ազգային կենտրոն՚ ՀԿ-ն` ԵԱՀԿ-ի ֆինանսավորմամբ: Երեւանի 1282 բնակիչների շրջանում կատարված հարցումից պարզվել է, նրանց 85 տոկոսը չի ցանկանում համագործակցել ոստիկանության հետ, 77 տոկոսը, բացի անհրաժեշտության դեպքում ոստիկանություն ահազանգելուց, այլ կերպ չի պատկերացնում ոստիկանության հետ համագործակցությունը: Ըստ նույն հարցումների` ոստիկանության գործունեության մասին ժողովրդի ունեցած տեղեկատվության երկրորդ աղբյուրը (հեռուստատեսությունից հետո) ասեկոսեներն են: ՙ Կլոր սեղանի՚ ժամանակ ԵԱՀԿ երեւանյան գրասենյակի ռազմաքաղաքական հարցերով ազգային պատասխանատու Սուսաննա Նալթակյանը խոսելով լրատվամիջոցներ-ոստիկանություն փոխհարաբերություննեորի մասին, ասաց, որ երկու կառույցներն էլ սկսել են գիտակցել, որ ժողովրդավարական երկրում այդ համագործակցությունն անհրաժեշտ է, դրա համար իրավական դաշտում խոչընդոտներ չկան, շփումն է պակասում: Քնարկման ժամանակ նշվեց, որ երկու կառույցների միջեւ անվստահությունն ավելի է խորացել 2008թ. մարտի 1-ի դեպքերից հետո: Այդ անվստահությունը ակնհայտ է անգամ սովորական կենցաղային մակարդակում: ՙԿլոր սեղանի՚ ժամանակ էլ Տավուշի մարզի լրագրողները եւ ոտիկանության աշխատակիցները առանձին շարքերով էին նստել: Բնականաբար, լրագրողները եւ ոստիկանները միմյանց ասելու շատ բան ունեին: Ոստիկանության Տավուշի մարզային վարչության պետի կադրերի գծով տեղակալ Սամվել Ավետիսյանը ասաց, որ մարզի ոստիկանները խոչընդոտներ չեն ստեղծում լրագրողների աշխատանքի համար, վերջիններս խորհուրդ տվեց իրենց վրա ՙցեխ չշպրտել՚, քննադատելիս չչարախնդալ: Ելույթ ունեցած ոստիկանության սպաները բողոքեցին, որ հասարակության մեջ երբեմն սերմանվում է ոստիկանի` որպես ՙբոբոյի՚ կերպարը, որ մերօրյա հեռուստատեսային սերիալներում հաճախ ոստիկանության սպան ներկայացվում է խեղճ կամ գողերի ընկերակից, իսկ ՙգողականը՚` բարոյական արժեքների կրող: Ոստիկանության աշխատակիցները դժգոհեցին , որ ոստիկանության վերաբերյալ օրենսդրությունը բարեփոխվել է, դարձել եվրոպական չափանիշներին համապատասխան, սակայն ոստիկանության տեխնիկական հագեցվածությունը բարելավման կարիք ունի:

Հայրենի ոստիկանությունը սերելով խորհրդային միլիցիայից` բնականավար դեռեւս լիովին չի ձերբազատվել նախորդի մտածելակերպից: ՙԿլոր սեղանի՚ ժամանակ զեկուցումով հանդես եկավ տողերիս հեղինակը, ով քննարկման մասնակիցների ուշադրությունը հրավիրեց այն հանգամանքի վրա, որ մարզի ոստիկանության 5 բաժինների պետերից ոչ մեկը ներկա չէ ՙկլոր սեղանին՚, այսինքն` ներկա չեն առաջին դեմքերը` որոշում ընդունողները: Գրեթե անհնար է տրամաբանական ժամկետում մարզի ոստիկանությունից տեղեկատվություն ստանալ կատարված քրեական դեպքերի մասին: Տավուշի ոստիկանության աշխատանքի վրա ստվեր են գցում սահմանամերձ գյուղերում կատարված, այդպես էլ բացահատված անասնագողությունները, վերջերս կատարված ավազակային հարձակումները, լրավամիջոցներին ՙյուրայինի՚ եւ ՙօտար՚ համարելու գործելակերպը եւ ըստ այդմ` տեղեկատվություն տրամադրելը եւ մերժելը: Քննարկման մասնակիցները կարեւորեցին ոստիկանության եւ լրավամիջոցների փոխադարձ հանդուրժողականությունը, առկա անվստահության հաղթահարումը: Ներկայումս քննարկվում է ոստիկանության Տավուշի մարզային վարչությունում լրատվության եւ հասարակայնության հետ կապերի համակարգողի հաստիք ստեղծելու հարցը: ՙԿլոր սեղանը՚ հաջողված էր առնվազն այն առումներով, որ այդ մի քանի ժամվա ընթացքում լրագրողները եւ ոստիկանության սպաները ծանոթացան իրար հետ, շփվեցին, լսեցին միմյանց փաստարկները: Հրաժեշտի ձեռքսեղմումներն էլ մի տեսակ ջերմ էին: