Անցյալ տարի գործարկվեց Իջեւանի ՙԱրնար՚ ֆուտբոլային մարզադաշտը: 2008թ. այստեղ կայացավ հանրապետության գավաթի խաղարկության եզրափակիչը: Վերջերս այս մարզադաշտում  տեղի ունեցավ ֆուտբոլի  Տավուշի մարզի առաջնությունը,  մրցանակակիր թիմերին պարգեւներ հանձնեցին ՀՀ նախագահի խորհրդական, հանրահայտ  Յուրի Վարդանյանը եւ Խորեն Հովհաննիսյանը: Նոյեմբերի 8-ին ՙԱրնար՚ մարզադաշտում հանդիպեցին ՙԱրարատի՚  եւ Իջեւան քաղաքի վետերանները: ՙԱրարատ-73՚ թիմից մրցավեճին մասնակցում էին Ալյոշա Աբրահամյանը, Սերգեյ Պողոսյանը, Նիկոլայ Ղազարյանը, Էդուարդ Մարգարովը, ինչպես նաեւ` ՙԱրարատի՚ վետերաններ  Խորեն Հովհաննիսյանը, Բաբկեն Մելիքյանը, Տիգրան Գսպեյանը, Սերգեյ Հայրբաբամյանը  եւ ուրիշներ: Յուրաքանչյուր խաղակեսը  30 րոպե էր: ՙԱրարատի՚ վետերանները չնայած  տարիքին, ավելորդ քաշին`  գնդակի տիրապետման լավ տեխնիկա էին ցուցադրում: Գրեթե  իր երբեմնի խաղն  էր ցուցադրում Խորեն Հովհաննիսյանը, ում հարվածներից հետո առաջին խաղակեսում երկու անգամ գնդակը դիպավ դարպասաձողին: Առաջին խաղակեսն ավարտվեց 0:0 հաշվով: Երկրորդում Խորեն Հովհաննիսյանը 3 գեղեցիկ գոլի հեղինակ դարձավ: Իջեւանի թիմի կազմում 2 գոլ խփեց  Արամ Վարդանյանը: Նա երեւանցի է, պարզապես համալրել էր Իջեւանի թիմը:  Սակայն իջեւանցիների  լավագույն ֆուտբոլիստը  ժամանակին Հայաստանի բարձրագույն խմբի առաջնությանը մասնակցած Գուրգեն Հարությունյանն էր, ով  գրոհների կազմակերպիչն էր:ՙԱրարատի՚ վետերանների թիմը ընկերական խաղում  հաղթեց 3:2 հաշվով: Մրցավարը ֆուտբոլի նվիրյալ, Տավուշի մարզի Ազատամուտի գյուղապետ ժորա Մարտիրոսյանն էր:   Ի դեպ,  ներկա ֆուտբոլասերների  համար հանդիպումը կենդանի հումորով, իրեն հատուկ աշխույժ ոճով մեկնաբանեց    Սուրեն Բաղդասարյանը: Օրինակ, երբ իջեւանցի վետերաններից մեկի հարվածից հետո գնդակը մեծ բարձրությամբ ընթացավ դարպասի վրայով,Բաղդասարյանը արձագանքեց. ՙԳնդակը սլացավ դեպի Իջեւանի բարձր լեռները՚: Հանդիպումից հետո մեզ հետ զրույցում  հայտնի մեկնաբանն  ասաց, որ հայկական ֆուտբոլի զարգացման, ուժեղ հավաքական ունենալու համար անհրաժեշտ  է, որ մարզերում էլ լինեն մարզադպրոցներ, մանկապատանեկան թիմեր, անցկացվեն առաջնություններ:  Ինչու՞ այսօր Հայաստանում ֆուտբոլը  նահանջ  է ապրում,  մեր ազգային ընտրանին պարտություններ է կրում: Այս հարցին  Սերգեյ Պողոսյանը պատասխանեց, թե  ֆուտբոլիստը պիտի ամբողջությամբ նվիրվի խաղին, հոգի ներդրի, հավաքականի խաղացողն էլ ՙթասիբ՚ պիտի ունենա, քանի որ երկրի եւ ազգի պատիվն է պաշտպանում: Ինչն այսօր, ցավոք,  բացակայում է: Խորեն Հովհաննիսյանն ասաց, որ տպավորված է իր բարեկամ, իջեւանցի գործարար Արծրունի Ղալումյանի աշխատանքից, ով նման բարձրորակ մարզադաշտ է կառուցել: Խորենն արդեն 2 տարի Հունաստանում է ապրում:  Հարցրի որդու` Ժորիկի մարզական գործերի մասին: Հունական ՙՕլիմպիակոսը՚ նրան  վարձավճարով հանձնել է երկրորդ լիգայի թիմերից մեկին: ժորիկ Մարտիրոսյանի թիմն ընթանում է առաջին տեղում, ինքն  էլ  5 խաղում 7 գոլի հեղինակ է դարձել:


Ոսկան Սարգսյան