2007 թվականից Տավուշի մարզի 6 համայնքներում «Հայաստան» համահայկական հիմնադրամի «Գյուղական զարգացման» ծրագրով աշխատանքներ է կատարում ՄԱԿ-ի Զարգացման ծրագիրը՝ Իտալիայի կառավարության ֆինանսական աջակցությամբ: Երեկ Լուսաձոր գյուղում ավարտվեց հերթական ծրագիրը: Մարզպետ Արմեն Ղուլարյանի, Հայաստանում ՄԱԿ-ի մշտական համակարգող Կոնսուելո Վիդալի եւ Հայաստանում Իտալիայի դեսպան Բրունո Սկապինի մասնակցությամբ բացվեց 6,2 կմ խմելու ջրի ցանցը՝ նոր ջրհան կայանով, վերանորոգված ջրամբարներով. Լուսաձորի բնակիչներն այլեւս շուրջօրյա խմելու ջուր ունեն: 

Բացի սրանից, լուսաձորցիները ուրախանալու այլ առիթ էլ ունեին. 90-180 քառ. մետր մակերեսով ջերմատների կառուցումը, որոնք կծառայեն 13 տնտեսությունների: Ըստ նախնական տվյալների, ջերմատների շահագործման ծրագրում ներգրավված յուրաքանչյուր տնտեսություն տարեկան ընտանեկան եկամուտը կավելացնի 600 եվրոյով, իսկ լիարժեք աշխատանքի դեպքում ձմռան ամիսներին լուսաձորցիները կարող են բավարարել տարածաշրջանի բանջարեղենի պահանջարկը: «Գյուղական զարգացման» ծրագրի հիմքում դրված է եղել հենց այս նպատակը, ոչ միայն բարելավել ենթակառուցվածքների աշխատանքը, այլ նաեւ նպաստել համայնքի տնտեսության կայունացմանը, բնակիչների եկամտի ավելացմանը: 

Հայաստանում ՄԱԿ-ի մշտական ներկայացուցիչ Կոնսուելո Վիդալի կարծիքով, Տավուշի մարզի հետ համագործակցությունը լավագույն օրինակ է, թե ինչպես է ՄԱԿ-ը մարդասիրականից անցնում զարգացման ծրագրերի իրականացման: 

  
Տ. ՄՈՒՐԱԴՅԱՆ
new.aravot.am